घोराही, २० माघ । दाङमा प्रहरीले ठूलो मात्रामा हतियार बरामद गरेको छ । राजपुर गाउँपालिका वडा नम्बर ७ भौवानाकामा विभिन्न प्रकारका हतियार बनाउने कारखानामा छापा मारेर प्रहरीले सहित सहित हतियार बनाउने व्यक्तिलाई नियन्त्रणमा लिएको हो ।
जिल्ला प्रहरी कार्यालय दाङले आज पत्रकार सम्मेलन गरि भौवानाका निबासी ५९ बर्षिय जितबहादुर बुढालाई विभिन्न प्रकारका हतियार सहित सार्वजनिक गरेको हो । हतियार बनाउने कारखानाबाट बरामद भएका भरुवा बन्दुक ५ थान, एयरगन राईफल ३ थान, १२ बोरको राइफल १ थान, कटुवा पेस्तोल १ थान, ठूलो हतियारको नाल २९ थान र सानो हतियारको नाल १२ थान सहित हतियार बनाउने बिभिन्न सामाग्रिहरु प्रहरीले बरामद गरेर प्रहरी प्रमुख एसपी वेलबहादुर पाण्डेले जानकारी दिनुभयो ।
पक्राउ परेका बुढालाई मूलुकी अपराध संहित ऐन २०७४ को परिच्छेद ६ को दफा १२९ बमोजिम हातहतियार तथा खरखजाना सम्बन्धी मुद्धामा अदालतबाट म्याद थप गरेर अनुसन्धान र कार्वाही प्रकृया अघि बढाईएको प्रहरी प्रमुख पाण्डेले जानकारी दिनुभयो । साथै सोही ठाउँका ३८ बर्षिय रुद्रमणी घर्तीलाई पनि एक थान भरुवा बन्दुक सहित प्रहरीले पक्राउ गरी सार्वजनिक गरेको छ । हतियार बनाउने बुढाकै कारखानाबाट ३ बर्ष पहिले १० हजारमा किनेको भरुवा बन्दुक सहित घर्तीलाई पक्राउ गरि कार्वाही प्रकृया अघि बढाईएको प्रहरी प्रमुख पाण्डेले पत्रकार सम्मेलनमा जानकारी दिनुभयो ।
यसैविच दाङ प्रहरीले विभिन्न स्थानबाट चालु आर्थिक बर्षमा ७ वटा भरुवा बन्दुक, २ थान रिभल्वर र एउटा पेस्तोल गरी १० थान हतियार बरामद गरेको पनि जानकारी दिएको छ ।
