काठमाडौं, ११ कार्तिक। बागमती प्रदेशका मुख्यमन्त्री किरण थापा मगरले युवा पलायनले मुलुकलाई उन्नतितर्फ नभई अवनतितर्फ लैजाने बताउनुभएको छ। उहाँले विदेशमा रहेका नेपालीको सीप, जागर र पसिनालाई देशको विकासमा उपयोग गर्नुपर्नेमा जोड दिनुभएको छ।
मुख्यमन्त्री थापा मगरले नेपाली नागरिक विश्वको जुनसुकै कुनामा रहे पनि उनीहरूको प्रतिष्ठा राष्ट्रको प्रतिष्ठासँग जोडिने उल्लेख गर्दै स्थायी वा अस्थायी रूपमा विदेशमा बस्दैमा देशसँगको सम्बन्ध नटुट्ने बताउनुभएको हो। ‘नेपाली विश्वमा जहाँ रहे पनि नेपालीमूलको भन्ने नै हुन्छ, त्यसैले राष्ट्रको प्रतिष्ठासँग नेपालीको प्रतिष्ठा पनि सँगै जोडिएको हुन्छ,’ उहाँले भन्नुभएको छ।
उहाँले रोजगारी, अध्ययन तथा अन्य कारणले विदेशमा रहेका नेपाली नागरिकलाई देशबाट टाढिएको रूपमा मात्र हेर्न नहुने धारणा व्यक्त गर्नुभएको छ। विदेशमा रहेका नेपालीको ज्ञान, सीप र अनुभवलाई राष्ट्रिय विकाससँग जोड्न सके मुलुकले लाभ लिन सक्ने उहाँको भनाइ छ। ‘मुलुक स्थायी वा अस्थायी रूपले छोड्दैमा देशसँगको सम्बन्ध तोडिन सक्दैन र तोडिएको पनि हुँदैन,’ मुख्यमन्त्री थापा मगरले भन्नुभएको छ।
उहाँले विदेशमा रहेका नेपालीको सीप, जागर र पसिनाको सदुपयोग गर्ने नीति तथा वातावरण निर्माण गर्नुपर्ने आवश्यकता औँल्याउनुभएको छ। विदेशमा आर्जन गरेको ज्ञान, प्रविधि, पुँजी र अनुभवलाई स्वदेशको विकासमा परिचालन गर्न सके देशको समृद्धिमा योगदान पुग्ने उहाँको धारणाको आशय छ।
युवा जनशक्ति विदेशिने क्रम बढ्दा मुलुकको उत्पादन, विकास र समृद्धिमा असर पर्न सक्ने भन्दै मुख्यमन्त्री थापा मगरले युवालाई स्वदेशमै सम्भावना र अवसर उपलब्ध गराउनुपर्ने सन्देश दिनुभएको छ। ‘अब विदेशमा रहेका नेपालीहरूको सीप, जाँगर र पसिनाको प्रयोग हाम्रो देशले गर्न सक्नुपर्छ, युवा पलायनले देशलाई उन्नतितर्फ होइन, अवनतितर्फ मात्र लैजान्छ,’ उहाँले भन्नुभएको छ।
मुख्यमन्त्री थापा मगरको अभिव्यक्तिले विदेशमा रहेका नेपालीको योगदानलाई राष्ट्रिय विकाससँग जोड्ने तथा युवा जनशक्तिलाई स्वदेशमै अवसर सिर्जना गर्ने आवश्यकतामाथि जोड दिएको छ।
