गस्तीमा गएका प्रहरीको दुर्घटनामा मृत्यु

घोराही, १२ वैशाख । मोटरसाइकल गस्तीमा रहेका एक प्रहरी जवानको मंगलबार राति दुर्घटनामा परि ज्यान गएको छ । अर्का प्रहरी जवान घाइते भएका छन् ।

बा २ प ११११ नम्बरको मोटरसाइलमा गस्तीमा रहेका बेला दुर्घटनामा परेर सुवर्णावती गाउँपालिका वडा नं २ खुग्री रोल्पा घर भई वडा प्रहरी कार्यालय घोराहीमा कार्यरत ओवीलाल गिरीको ज्यान गएको दाङका प्रहरी प्रमुख दुर्गा सिंहले जानकारी दिनुभयो  । दुर्घटनामा परेर गिरीसँगै गस्तिमा रहेका प्रहरी जवान वसन्तराज अधिकारी घाइते हुनुभएको छ । उहाँको अवस्था सामान्य रहेको छ ।

घोराही–रामपुर सडकखण्ड अन्तर्गत लक्ष्मीपुर चोकमा दुर्घटना भएको थियो । गिरी र अधिकारी मंगलबार राति १२  बजेदेखि बुधबार बिहान ६ बजेसम्म यो क्षत्रमा मोटरसाइल गस्तिमा रहेको जिल्ला प्रहरी कार्यालयले जनाएको छ । घटनाबारे थप अनुसन्धान भइरहेको प्रहरीले जनाएको छ ।