घोराहीका जलाशयलाई उत्पादनसँग जोड्न मुख्यमन्त्रीको आग्रह

घोराही, २८ वैशाख । प्रदेश नम्बर ५ का मुख्यमन्त्री शंकर पोख्रेलले घोराही उपमहानगरपालिकाले स्थापना गरेका जलाशयहरुको अवलोकन गर्नुभएको छ । घोराही उपमहानगरपालिकाका प्रमुख नरुलाल चौधरीले सीमसार क्षेत्र विस्तार गर्ने, पानीको मुहान बढाउने, स्रोतको संरक्षण गर्दै जलाशयबाट किसानहरुले लाभ लिने उद्देश्यले निर्माण गरिएका जलाशयहरुको मुख्यमन्त्रीलाई अवलोकन गराउनुभएको हो ।घोराही उपमहानगरपालिका वडा नम्बर १६ बाहुनडाँडाको गंगटे, वडा नम्बर १७ को ढिकपुर र आरोग्य जलाशयको मुख्यमन्त्री पोख्रेलले अवलोकन गर्नुभएको हो । अवलोकन गर्दै मुख्यमन्त्री पोख्रेलले पानीको स्रोत बढाउने र किसानलाई फाइदा पुग्नेखालका जलाशय निर्माणले दीर्घकालीन फाईदा पुर्‍याउने बताउनुभयो ।

जलाशयलाई सुरक्षित बनाउँदै अधिकतम लाभ लिन उपमहानगर र स्थानीयबासीलाई आग्रह गर्नुभएको छ । जलाशय आसपासमा किसानहरुले मकै र तरकारी खेती गरेर राम्रो आम्दानी गर्न समेत सफल भएका छन् । जलाशयलाई स्थानीयहरुले नै संरक्षण गर्नुपर्ने भन्दै अधिकतम लाभ लिन समेत सुझाब दिनुभयो ।जलाशयमा माछा पालन र पानीबाट सिंचाईमा विषेश ध्यान दिँदै आयस्रोत बढाउने गरी प्रयोगमा ल्याउन मुख्यमन्त्री पोख्रेलले आग्रह गर्नुभयो । उपमहानगरपालिकाका प्रमुख नरुलाल चौधरीले पानीको स्रोत बढाउने र किसानहरुलाई उत्पादनसँग जोड्न आगामी वर्षहरुमा पनि जलाशय निर्माणका योजनाहरु अघि सार्ने बताउनुभयो ।

मुख्यमन्त्री पोख्रेलले घोराही १७ गुलरीयामा निर्माणाधीन खेल मैदानको समेत अवलोकन गर्नुभएको छ । प्रदेशस्तरको रंगशाला बनाउने गरी आफूहरुले काम गर्ने समेत मुख्यमन्त्री पोख्रलले बताउनुभयो ।