घोराही, २४ जेठ । घोराहीलाई कला, संस्कृति, साहित्य, शिक्षा, पर्यटन तथा सामाजिक चेतनाको केन्द्रका रूपमा विकास गर्ने उद्देश्यसहित पहल थिएटर (सामुदायिक कलाघर) र घोराही बनाऔं अभियानबीच औपचारिक सहकार्य सम्झौता भएको छ।
आइतबार आयोजित एक कार्यक्रममा पहल थिएटरका अध्यक्ष केएल बुढाथोकी र घोराही बनाऔं अभियानका संयोजक सबिन प्रियासन ले सहकार्य पत्रमा हस्ताक्षर गर्दै दुई संस्थाबीच दीर्घकालीन साझेदारीको घोषणा गर्नुभएको हो।
सम्झौताले घोराहीलाई सिर्जनशील, सभ्य, सुन्दर र सांस्कृतिक नगरका रूपमा स्थापित गर्ने साझा अभियानलाई थप बल पुग्ने विश्वास गरिएको छ।
सहकार्यअन्तर्गत नाटक, संगीत, लोकनृत्य, साहित्यिक तथा सांस्कृतिक महोत्सव, सडक नाटक, जनचेतनामूलक अभियान, युवा नेतृत्व विकास कार्यक्रम तथा विभिन्न सिर्जनात्मक गतिविधिहरू सञ्चालन गरिनेछ। साथै घोराहीको इतिहास, संस्कृति र पर्यटकीय सम्भावनालाई उजागर गर्ने नाटक तथा वृत्तचित्र निर्माणमा समेत दुवै संस्थाले सहकार्य गर्नेछन्।
कार्यक्रममा बोल्दै पहल थिएटरका अध्यक्ष केएल बुढाथोकीले कला र संस्कृतिले समाज रूपान्तरणको महत्वपूर्ण आधार तयार गर्ने बताउँदै घोराहीलाई सिर्जनशील नगरका रूपमा स्थापित गर्न सहकार्य कोशेढुंगा सावित हुने विश्वास व्यक्त गर्नुभयो।
त्यसैगरी घोराही बनाऔं अभियानका संयोजक सबिन प्रियासनले नागरिक अभियान र सांस्कृतिक आन्दोलनको एकताले समाजमा सकारात्मक परिवर्तन ल्याउन सक्ने बताउँदै घोराहीको समृद्धि र पहिचान निर्माणमा सहकार्य केन्द्रित रहने धारणा राख्नुभयो।
सम्झौताअनुसार दुवै संस्थाका प्रतिनिधिहरू सम्मिलित सात सदस्यीय संयुक्त कार्यक्रम समिति गठन गरिनेछ। समितिले वार्षिक कार्ययोजना निर्माण, कार्यक्रम कार्यान्वयन तथा स्रोत व्यवस्थापनमा समन्वय गर्नेछ।
पहल थिएटरले कलात्मक तथा प्राविधिक नेतृत्व, कलाकार तथा प्रशिक्षक व्यवस्थापन तथा कार्यक्रम सञ्चालनको जिम्मेवारी लिनेछ भने घोराही बनाऔं अभियानले समुदाय परिचालन, विभिन्न निकायसँग समन्वय, स्रोत व्यवस्थापन र प्रचारप्रसारको नेतृत्व गर्नेछ।
दुवै संस्थाले स्थानीय सरकार, निजी क्षेत्र, सामाजिक संस्था तथा दातृ निकायसँग संयुक्त सहकार्य गर्दै घोराहीको सांस्कृतिक तथा सामाजिक विकासका लागि साझा अभियान सञ्चालन गर्ने प्रतिबद्धता व्यक्त गरेका छन्।
सहकार्यबाट घोराहीमा सांस्कृतिक गतिविधिको विस्तार, युवाहरूको प्रतिभा विकास, सामाजिक चेतना अभिवृद्धि, नागरिक सहभागिताको विस्तार तथा घोराहीको सांस्कृतिक पहिचान सुदृढ हुने अपेक्षा गरिएको छ।
समारोहको अन्त्यमा दुवै संस्थाले संयुक्त प्रतिबद्धता व्यक्त गर्दै घोषणा गरेका छन्—
“सुन्दर घोराही, सभ्य घोराही, सिर्जनशील घोराही निर्माणका लागि कला, संस्कृति र नागरिक अभियानको हातेमालो।”
दुवै संस्थाले आफ्नो साझा नारासमेत सार्वजनिक गरेका छन्—
“कला बोलोस्, समाज बदलियोस्; घोराही सिर्जनाको राजधानी बनोस्।”
