दाङ, २७ चैत । नेकपा एमाले दाङले वडा तहमा उम्मेद्वार चयनको प्रक्रिया अघि बढाएको छ । एमाले दाङ प्रचार विभागले आज पार्टी कार्यालय भरतपुरमा गरेको कार्यक्रमको पार्टीका महासचिव शंकर पोख्रेलले भर्चुअल विधिबाट उद्घाटन गरेसँगै उम्मेद्वार चयनको प्रक्रिया शुरु भएको छ ।
कार्यक्रमलाई एमाले महासचिव शंकर पोख्रेलले भर्चुअल विधिबाट सम्बोधन गर्नुभएको थियो । कार्यक्रमलाई सम्बोधन गर्दै महासचिव पोख्रेलले योग्य र विकास बुझेको व्यक्तिलाई उम्मेद्वार बनाउन निर्देशन दिनुभयो । पार्टीमाथि भैरहेको चौतर्फी घेराबन्दी र आक्रमणलाई चिर्दै समग्र पार्टी पंक्ति अघि बढ्नुपर्ने उहाँले धारणा राख्नुभयो ।
कार्यक्रममा एमाले दाङका सचिव मनोहर बुढाथोकीले जिल्लाका सबै वडामा सर्वसम्मत उम्मेद्वार चयनलाई प्राथमिक दिन निर्देशन दिनुभयो । वडामा जनतामाझ भिजेका र पार्टीको नीतिलाई आत्मसात गर्ने व्यक्तिलाई उम्मेद्वार बनाउनुपर्ने उहाँको भनाइ थियो ।
कार्यक्रम नेकपा एमाले दाङ प्रचार विभाग प्रमुख सविन प्रियासनको अध्यक्षतामा भएको थियो भने कार्यक्रमको सञ्चालन प्रेस चौतारी दाङका अध्यक्ष इन्द्र डिसीले गर्नुभएको थियो ।
जिल्लाका १० वटा पालिकामा १०० वडा वडाहरु रहेका छन् । अधिकांश वडाहरुमा उम्मेद््वार छनौटका लागि छलफल भइरहेको एमाले दाङले जनाएको छ । २०७४ को स्थानीय तहको निर्वाचनमा एमालेले दुई उपमहानगरपालिका, एक नगरपालिका र तीन वटा गाउँपालिकाको नेतृत्वसहित अधिकांश वडा जितेको थियो ।
