दाङ, ३० चैत । प्रेस चौतारी दाङले स्थानीय तहको निर्वाचनलाई लक्षित गरेर जिल्लाका दशवटै पालिकामा सञ्चार डेस्क स्थापना गर्ने भएको छ । चौतारी दाङको बुधवार बसेको बैठकले दशवटै पालिका र पालिकाहरुलाई समन्वय गर्न जिल्लास्तरीय छुट्टै सञ्चार डेस्क स्थापना गर्ने निर्णय गरेको हो ।
त्यसैगरी बैठकले एक वडा एक चौतारी अभियानको समीक्षा गर्दै बाँकी ५ पालिकामा वैशाख २ गते प्रशिक्षण र पालिकास्तरीय कमिटी गठन गर्ने निर्णय गरेको छ । यसअघि जिल्लाका घोराही, उपमहानगरपालिका, बबई, शान्तिनगर, बंगलाचुली र राप्ती गाउँपालिकामा चौतारीको पालिकास्तरीय कमिटी गठन भइसकेको छ ।
बैठकले कमिटी गठन र प्रशिक्षणको सहजीकरणका लागि चौतारीका केन्द्रीय सदस्यहरु टीका बस्नेतलाई लमही नगरपालिका, गणेश आचार्यलाई तुलसीपुर उपमहानगरपालिका, दंगीशरणमा सन्तोष दहित र गढवा गाउँपालिकामा रीता लामा र सन्तोषकुमार गुप्ता, राजपुर गाउँपालिकामा विदुर एमसी र जिल्ला अध्यक्ष इन्द्र डिसीलाई प्रतिनिधिको रुपमा पठाउने निर्णय गरेको छ ।
त्यसैगरी पालिकाकाले गरेका राम्रा कामको ब्रोसर निर्माणको लागि केन्द्रीय सदस्य टीका बस्नेतको संयोजकत्वमा ७ सदस्यीय समिति गठन गरिएको छ । समितिको सदस्यहरुमा दुर्गालाल केसी, जे.एन. सागर, वसन्त आचार्य, रञ्जिता शर्मा, छवि पुरी र निमुसंगम घर्तीलाई जिम्मा दिने निर्णय गरेको चौतारी दाङका सचिव किरण गौतमले जानकारी दिनुभयो । बैठकमा प्रेस चौतारी नेपालको नवौँ महाधिवेशन र लुम्बिनी प्रदेश कमिटीको प्रथम अधिवेशनबाट जिल्लाबाट निर्वाचित पदाधिकारी, सदस्यलाई स्वागत सम्मान पनि गरिएको थियो ।
बैठकमा चौतारीका पालिका संयोजकहरुले पालिकामा संगठनले गरेको कामको रिपोर्टिङ गरेका थिए । बैठक चौतारी दाङका अध्यक्ष इन्द्र डिसीको अध्यक्षता एवम संगठनका केन्द्रीय उपाध्यक्ष सविन प्रियाशनको प्रमुख आतिथ्य र नेकपा एमाले दाङका सचिव मनोहर बुढाथोकीको विशिष्ट आतिथ्यमा सम्पन्न भएको थियो ।
बैठकमा नेकपा एमाले लुम्बिनी प्रदेश कमिटि सदस्य शरद अधिकारी, चौतारीका केन्द्रीय सदस्यहरु टीका बस्नेत, गणेश आचार्य, सन्तोष दहित, रीता लामा, चौतारी दाङका सल्लाहकार रञ्जिता शर्मा र चौतारी दाङका नेता तथा नेपाल पत्रकार महासंघ दाङका अध्यक्ष दुर्गालाल केसीलगायतले मन्तव्य व्यक्त गर्नुभएको थियो । बैठकको सहजिकरण चौतारी दाङका सचिव गौतमले गर्नुभएको थियो ।
