घोराही, २६ चैत । रमना पाठशाला घोराही–१२ ले सांस्कारिक र सीपमूलक शिक्षा आफ्नो प्राथमिकता रहेको बताएको छ ।
पाठशालाले आइतबार विद्यालयमै पत्रकार सम्मेलनको आयोजना गरी समय सापेक्षित पठनपाठनलाई प्राथमिकता दिइएको बताएको हो । नयाँ शैक्षिक सत्रका योजनाबारे जानकारी दिँदै पाठशालाका शैक्षिक निर्देशक कृष्णदेव थापाले खेलकुद, कला, संगीतलगायतका क्षेत्रलाई प्राथमिकता दिइएको बताउनुभयो । नयाँ शैक्षिक सत्रमा कक्षा १० सम्मको पठनपाठन सुरु गर्न थालेको पाठशालाले कम्प्युटर, साइन्स ल्यावलगायतका सुविधा विद्यार्थीहरुलाई दिएको बताउनुभयो ।
राम्रो शिक्षा लिनकै लागि घोराही बजार पुग्नुपर्ने बाध्यताको अन्त्य गरिएको भन्दै उहाँले दक्ष शिक्षकहरुबाट गुणस्तरीय शिक्षा उपलव्ध गराइने बताउनुभयो । विद्यालयले ३ सय विद्यार्थीमध्ये ६० जना दलित, जेहेन्दार, गरीव, जनजाति तथा विपन्नलाई निःशुल्क पठन पाठन गराइरहेको जनाएको छ । विद्यालय जानै नसक्नेहरुका लागि निःशुल्क पठनपाठनको व्यवस्था गरेको पाठशालाका शैक्षिक निर्देशक थापाले जानकारी दिनुभयो ।
विद्यालयले सरकारले निर्धारण गरेको नियमित पाठ्यक्रमसँगै स्थानीय पाठ्यक्रम लागु गर्न लागेको जनाएको छ । थापाले घोराही र दाङको चिनारी र यसक्षेत्रको प्राकृतिक सम्पदा, ऐतिहासिक स्थान, भुगोललगायत संस्कार, संस्कृतिलाई स्थानीय पाठ्यक्रममा समेटिएको बताउनुभयो । विद्यालयमा नियमित स्वास्थ्य जाँच गर्न एक जना हेल्थ असिष्टेन्टको व्यवस्था गरिएको र वेड राखेर २४ सै घण्टा विद्यार्थीहरुको स्वास्थ्य जाँच पनि भइरहेको बाउनुभयो ।
मल्टिमिडियामा आधारित अध्यापन रहेको रमना पाठशालामा होली, माघी, दशैँ, धान दिवस, तीजलगायत सांस्कृतिक पर्वमा विद्यार्थीहरुकै सहभागितामा मनाइने विद्यालयले जनाएको छ । रमणीय क्षेत्रमा रहेको पाठशाला आगामी वर्ष पूर्ण वातावरणमैत्री बनाउने योजना रहेको पत्रकार सम्मेलनमा जानकारी दिइएको थियो ।
पाठशाला सञ्चालक समितिका अध्यक्ष बलबहादुर बुढाको अध्यक्षता तथा नेपाल पत्रकार महासंघका निवर्तमान अध्यक्ष सविन प्रियाशनको प्रमुख आतिथ्यतामा भएको थियो । प्रिन्सिपल विष्णु हमालको स्वागत मन्तव्यबाट सुरु भएको कार्यक्रममा विद्यालयका योजना र शैक्षिक गतिविधिबारे शैक्षिक निर्देशक कृष्णदेव थापाले प्रस्तुति राख्नुभएको थियो ।
शर्मा प्रेस संयोजक
रमना पाठशालाले पत्रकार सुवास शर्मालाई विद्यालयको प्रेस संयोजकमा नियुक्त गरेको छ । विद्यालयको सञ्चालक समितिको बैठकले शर्मालाई विद्यालयको सञ्चार संयोजनका लागि नियुक्त गरेको हो । शनिवार विद्यालय सञ्चालक समितिका अध्यक्ष बलबहादुर बुढाले खादा लगाएर शर्मालाई स्वागत गर्नुभएको थियो ।
