दाङ, ३ भाद्र । अप्टिमिस्ट क्लब घोराहीको अध्यक्षमा सनत गिरी चयन हुनुभएको छ । क्लबको आइतबार घोराहीमा सम्पन्न प्रथम अधिवेनबाट सन् २०२३/०२४ का लागि घोराही १५ निवासी गिरी अध्यक्षमा चयन हुनुभएको हो ।
क्लबको प्रेसिडेन्ट इलेक्टमा मुकेश्वर शर्मा, उपाध्यक्षमा प्रवेशराज जोशी, सचिवमा अमर अधिकारी, कोषाध्यक्षमा प्रदीप सिंह गहतराज, निर्देशकहरुमा किरण गौतम, किरण न्यौपाने र तेजविक्रम रावत चयन हुनुभएको छ । नवनिर्वाचित अध्यक्ष गिरीलाई संस्थापक अध्यक्ष निशान्त आचार्यले पदभार ग्रहण गराउनुभएको थियो ।
सन् १९११ मा न्युयोर्क अमेरिकामा स्थापना भएको अप्टिमिस्ट क्लबमा हाल नेपालभर ४७ वटा क्लबहरु रहेका छन् । सन् २०२१ मा नेपालमा स्थापना भएको क्लब विश्वका २९ वटा देशहरुमा स्थापना भई हाल ८० हजार बढी सदस्यहरु क्रियाशील छन् ।
बालबालिकाहरुलाई विशेष महत्व दिनुका साथै उनीहरुको पूर्ण क्षमतामा विकास गर्ने स्वयंसेवी संस्थाका रुपमा क्लब विश्वव्यापी रुपमा परिचित छ । अप्टिमिस्ट क्लब युवाहरुको नेतृत्व विकास एवं सकारात्मक दृष्टि ल्याउने उद्देश्यका साथ क्रियाशील अन्तर्राष्ट्रिय संस्था हो ।
जीवन दर्शनको रुपमा आशावादको विकास गर्न, राम्रो सरकार र नागरिक मामिलाहरुमा सक्रिय चासो प्रवद्र्धन गर्न, कानूनको सम्मान गर्न प्रेरित गर्न, देशभक्ति एवं सबै मानिसहरुबीच अन्तर्राष्ट्रिय सम्झौता र मित्रताको लागि काम गर्ने समेत क्लबको उद्देश्य रहेको छ ।
मानवीय सेवामा अर्पित हुँदै मानव जाति, सामुदायिक जीवन र विश्वको हितलाई अगाडि बढाउने विश्वासमा युवाहरुको विकासमा सहयोग र प्रोत्साहन गर्न क्रियाशील छ ।
