दाङ, १७ भदौ । त्रिभुवननगर जेसीज दाङले पहाडी विकट बस्ती बंगलाचुलीमा निःशुल्क स्वास्थ्य शिविर सम्पन्न गरेको छ । शनिबार त्रिभुवननगर जेसीजको आयोजना तथा बुद्ध इन्टरनेशनल हस्पिटल प्रालि घोराही, दाङको प्राविधिक सहयोगमा भएको शिविरमा ३ सय ५० बढीले स्वास्थ्य सेवा लिएका छन् ।शिविरमा सबैभन्दा बढी बिरामीहरु डाढ, नसा तथा जोर्नी सम्बन्धी सेवाका लागि आएको उपचारमा संलग्न डा. रमेश बस्नेतले जानकारी दिनुभयो । साथै स्त्री तथा प्रजनन् सम्बन्धी समस्याका बिरामीहरुसमेत ठूलो संख्यामा उपचारका लागि आएको आयोजकले जनाएको छ ।
शिविरमा भिडियो एक्स–रेका साथै निःशुल्क रुपमा ल्याब सेवा समेत उपलब्ध गराइएको थियो । उक्त शिविरबाट करिब १९० जनालाई भिडियो एक्स–रेको सेवा उपलब्ध गराइएको प्राथमिक स्वास्य केन्द्र स्यूजाका इन्चार्ज विकास घिमिरेले जानकारी दिनुभयो ।
शिविरको उद्घाटनका अवसरमा बोल्दै कार्यक्रमका प्रमुख अतिथि बंगलाचुली गाउँपालिकाका अध्यक्ष तुलसीराम पुनले ग्रामीण वस्तीमा स्वास्थ्य सेवा सहज पहुँच नभएको हुँदा यस्ता शिविरहरु उपलब्धीपूर्ण हुने धारणा राख्नुभयो । एकीकृत सेवा सहितको स्वास्थ्य शिविर पालिकामा यो पहिलो भएको बताउँदै उहाँले शिविर आयोजना गरेकोमा आयोजकप्रति आभार व्यक्त गर्नुभयो ।
विशेषज्ञ सहितको स्वास्थ्य सेवाका लागि घण्टौँ हिँडेर तथा दिनभरको जोखिमपूर्ण यात्रा गर्दै जिल्ला सदरमुकाम जानुपर्नेमा स्थानीय स्तरमै शिविर आयोजना गरिएकोमा स्थानीयहरु खुसी देखिन्थे । आफ्नो गाउँठाउँमै शिविरबाट भिडियो एक्स–रेका साथै विशेषज्ञसहितको गुणस्तरीय सेवा पाएकोमा आफू निकै हर्षित भएको स्थानीय गोमा सुनारले बताउनुभयो । “आफ्नै ठाउँमा उपचार पनि भयो, औषधि पनि पायौँ । असाध्यै खुसी लागेको छ” सुनारले भन्नुभयो ।स्वास्थ्य शिविरमा बुद्ध इन्टरनेशनल हस्पिटलमा कार्यरत सर्जन डा. रमेश बस्नेत, स्त्री तथा प्रसूतिरोग विशेषज्ञ डा. विमला तिवारी, रेडियोलोजिस्ट डा. विष्णु गौतम, दन्तरोग विशेषज्ञ डा. सिम्रन बखरेल, मेडिकल अफिसर डा. वसन्त पाण्डेय एवं राप्ती स्वास्थ्य विज्ञान प्रतिष्ठानमा कार्यरत रेडियोलोजिस्ट बम बिसीले स्वास्थ्य जाँच तथा उपचार गर्नुभएको थियो ।
शिविरमा उपचार गरिएका बिरामीहरुका लागि निःशुल्क रुपमा नेपाल औषधि तथा बिक्री प्रतिनिधि संघ, दाङले औषधि सहयोग गरेको थियो । शिविर बंगलाचुली गाउँपालिका, प्राथमिक स्वास्थ्य केन्द्र स्यूजा, बोचपोखराको समन्वयमा आयोजना भएको हो ।
त्रिभुवननगर जेसीजका निवर्तमान अध्यक्ष विवेक आचार्यको अध्यक्षतामा भएको उद्घाटन कार्यक्रमका अवसरमा बंगलाचुली गाउँपालिकाका उपाध्यक्ष भक्तबहादुर जिसी, डा. रमेश बस्नेत, वडा नं. १ का अध्यक्ष विष्णु कवर, स्वास्थ्य शाखा प्रमुख नेबबहादुर केसीलगायतले मन्तव्य व्यक्त गर्नुभएको थियो ।त्रिभुवननगर जेसीजका कार्यकारिणी उपाध्यक्ष अमर अधिकारीको जेसीज आस्थापाठबाट सुरु भएको कार्यक्रममा कार्यक्रम संयोजक गणेश वलीले स्वागत मन्तव्य व्यक्त गर्नुभएको थियो । कार्यक्रमको सहजीकरण त्रिभुवननगर जेसीजका महासचिव किरण गौतमले गर्नुभएको थियो ।
Advertisements
