दाङ, २० मंसिर । घोराही उपमहानगरपालिका वडानं. १६ सर्रास्थित ज्ञानमाला एकेडेमीको १६ औं वार्षिकोत्सव तथा अभिभावक दिवस सोमबार सम्पन्न भएको छ । विद्यालय व्यवस्थापन समिति अध्यक्ष चिजबहादुर चौधरीको अध्यक्षता र निजी तथा आवासीय विद्यालय अर्गनाइजेसन नेपाल (प्याव्सन) का केन्द्रीय सचिव यादव गिरीको प्रमुख आतिथ्यमा कार्यक्रमम सम्पन्न भएको थियो ।
कार्यक्रमलाई सम्बोधन गर्दै प्रमुख अतिथि गिरीले व्यवहारीक र जीवनोपयोगी शिक्षा अहिलेको आवश्यकता भएको बताउनुभयो । युवाहरु विदेश पलायन भैरहेको अवस्थामा युवालाई स्वदेशमै स्वरोजगार बनाउने खालको शिक्षा दिन आवश्यक रहेको उहाँले बताउनुभयो । यसका लागि राज्यले प्रभावकारी कार्यक्रम ल्याउनुपर्ने धारणा गिरीले व्यक्त गर्नुभयो । शिक्षित जनशक्तिलाई राज्यले उचित अवसर दिनुपर्ने विचार उहाँले व्यक्त गर्नुभयो ।
कार्यक्रमका विशिष्ट अतिथि घोराही उपमहानगरपालिका वडा नं. १६ का अध्यक्ष ताराबहादुर डाँगीले शिक्षामा सबैको समान पहुँच हुन आवश्यक रहेको धारणा व्यक्त गर्नुभयो । यस्तै विशिष्ट अतिथि प्याव्सन घोराही उपमहानगर कमिटी अध्यक्ष वीरेन्द्र चन्दले विद्यार्थीको भविष्य विद्यालयको हातमा मात्रै नभएर अभिभावकको जिम्मेवारीमा पनि निर्भर हुने विचार व्यक्त गर्नुभयो । कार्यक्रममा नेपाल पत्रकार महासंघ दाङ शाखा अध्यक्ष दुर्गालाल केसीले शिक्षाले मानिसको जीवन परिवर्तन गर्न भूमिका खेल्नुपर्ने विचार व्यक्त गर्नुभएको थियो ।
कार्यक्रममा पूर्व प्रिन्सिपल भुवन चौधरी, शहरी स्वास्थ्य केन्द्र घोराही–१६ करौँतीडाँडा, विद्यालयलाई कम्प्युटर सौजन्य गर्ने सरस्वती खड्का र विनोद केसीलाई सम्मान गरिएको थियो । यसैगरी उत्कृष्ट शिक्षकका रुपमा रुपक नेपाली, सर्वोत्कृष्ट अभिभावकका रुपमा अस्मिता भण्डारी र सिर्मा गुरुङलाई पनि सम्मान गरिएको थियो ।
कार्यक्रममा वर्ष सर्वोत्कृष्ट विद्यार्थी स्मारिका चौधरी, वर्ष उत्कृष्ट अनुशासित विद्यार्थी आरजु चौधरी, सामाजिकरुपमा सक्रिय वर्ष उत्कृष्ट विद्यार्थी विवेक श्रेष्ठ र जेहेन्दार विद्यार्थी मनिका लामिछानेलाई सम्मान गरिएको थियो । यस्तै पूर्व प्रावि तहतर्फ वर्ष उत्कृष्ट सरसफाईयुक्त विद्यार्थी शिरिषा योगी र प्राथमिकततर्फ वर्ष उत्कृष्ट सरसफाईयुक्त विद्यार्थी एलिना चौधरीलाई सम्मान गरिएको थियो ।
कार्यक्रममा विद्यालयका प्रिन्सिपल महेश बस्नेतले विद्यालयको प्रगति विवरण र आगामी योजनाहरु प्रस्तुत गर्नुभएको थियो । विद्यालयकी कार्यक्रम संयोजक विमला केसीको स्वागत मन्तव्यबाट शुरु भएको कार्यक्रमको सहजीकरण विद्यार्थी अदिती केसी र शिक्षक बिजेन्द्र कार्कीले गर्नुभएको थियो ।
