घोराही, १२ वैशाख । घोराही उपमहानगरपालिका वडा नम्बर ६ मा बालबालिकाका लागि तीन दिने सिर्जनात्मक कथा लेखन प्रशिक्षण कार्यक्रम सम्पन्न गरिएको छ । वडाध्यक्ष विष्णुराम आचार्यको अध्यक्षता तथा समाजसेवी ऋषिराज जङ्गलीको प्रमुख अतिथ्यतामा प्रशिक्षण कार्यक्रमको समापन गरिएको थियो ।
वडा नम्बर ६ भित्र रहेका मावि जजरा गाउँ र अर्वराइजिङ एकेडेमीका विद्यार्थीहरूको सहभागिता रहेको सिर्जनात्मक कथालेखन प्रशिक्षण कार्यक्रमको प्रमुख प्रशिक्षकमा नेपाल बाल साहित्य समाजका अध्यक्ष विजयराज आचार्य रहनुभएको थियो ।
कार्यक्रममा बोल्दै प्रमुख अतिथि जङ्गली, प्राध्यापक सुन्दर गौतमलगायतका वक्ताहरुले स्थानीय सरकारले भौतिक विकास मात्र नभई सामाजिक विकासलाई पनि ध्यान दिनुपर्ने बताउनुभएको थियो । जस अन्तर्गत वडा नम्बर ६ ले सामाजिक विकास अन्तर्गत बालबालिकाको विकासका लागि सिर्जनात्मक कथा लेखन प्रशिक्षण कार्यक्रम सम्पन्न गरेको बताउनुभएको थियो । भौतिक विकास तत्काल देखिने भएपनि सामाजिक विकासका क्षेत्रमा गरेको लगानी दीर्घकालिनरुपमा देखिनेमा वक्ताहरुको जोड थियो । वडा अध्यक्ष आचार्यले बालबालिकालाई तीन दिनसम्म सिकेका कुुरालाई कथा लेखनी मार्फत निरन्तरता दिन आग्रह गर्नुभएको थियो ।
प्रशिक्षण पश्चात बालबालिकाले लेखेका कथाहरु प्रस्तुत गर्नुका साथै प्रशिक्षणको अनुभव समेत सुनाएका थिए । रेनु वली, सिसन डांगी, दिया श्रेष्ठ, अस्मिता बिक र नम्रता बुढाथोकीले समाजमा रहेका विकृतिलाई दर्शाउदै खबरदारी गर्ने सन्देश समेटिएका कथाहरु वाचन गर्नुभएको थियो भने कामना चन्द, एलिजा नेपाली, निशान वली र अङ्किता चौधरीले प्रशिक्षार्थीका तर्फबाट अनुभव सुनाउनुभएको थियो ।
कार्यक्रमको सहजीकरण विद्यार्थी नम्रता बुढाथोकीले गर्नुभएको थियो ।
