दाङ, २० साउन ।
“ढुङ्गाको काप फोडेर पनि उम्रन्छ पीपल”
-राष्ट्रकवि माधव घिमिरे
राष्ट्रकवि माधव घिमिरेको यो भनाइले मानव जीवनको सङ्घर्ष र सिर्जनाशीलताको गहिरो सन्देश बोकेको छ। यो कथन सत्य साबित गरेका छन् दाङको राप्ती गाउँपालिका–८ का कृष्ण गिरीले, जसले जीवनका कठिन परिस्थितिलाई पार गर्दै शोकलाई सफलताको उज्यालो बाटोमा बदले।
कृष्णको जीवन सधैं सहज थिएन। राप्ती गाउँपालिका–८ मा जन्मिएका कृष्णका बुवाको ठूलो सपना थियो– छोरालाई शिक्षित बनाएर देशको कर्णधार बनाउने। तर, रोजगारीको सिलसिलामा भारतमा रहँदा बुवाको असामयिक निधनले कृष्णको परिवारमा ठूलो बज्रपात पर्यो। घरको आर्थिक र भावनात्मक आधार भत्कियो। यस्तो अवस्थामा सानै उमेरमा ठूलो जिम्मेवारी बोकेर अगाडि बढ्नुपर्ने बाध्यता आयो। तर, कृष्णले हिम्मत हारेनन्। बुवाको सपनालाई आफ्नो लक्ष्य बनाएर उनले सङ्घर्षको बाटो रोजे।
गाउँकै स्थानीय विद्यालयबाट एसइई उत्तीर्ण गरेका कृष्णमा सानैदेखि पढाइप्रति गहिरो लगाव थियो। उनको मेहनत र लगनशीलताले गाउँले शिक्षक र साथीहरूलाई प्रभावित पार्थ्यो। विज्ञान विषयमा उच्च शिक्षा हासिल गर्ने उनको सपनाले तुलसीपुर उपमहानगरपालिका–१९ हाडिमेस्थित दिदी शिला पौडेलको घरमा उनलाई डोहोर्यायो। दिदीको संरक्षणमा बसेर उनले आफ्नो अध्ययनलाई निरन्तरता दिए। कृष्णकी दिदी शिला पौडेलले भाइको सपनालाई साकार पार्न हरसम्भव प्रयास गरिन्। परिवारकी जेठी सन्तानको रूपमा उनले बुवाको अभावमा भाइको पढाइलाई निरन्तरता दिने जिम्मेवारी काँधमा लिइन्। शिलाले भनिन्, “बुवाको सपना पूरा गराउने जिम्मेवारी ममाथि आएको छ। भाइले दिनरात नभनी गरेको मेहनत र उसको लगाव देख्दा मलाई गर्व लाग्छ।” आँखामा हर्षाश्रु बोकेर उनले थपिन्, “हिजो भाइलाई अप्ठ्यारोमा साथ दिएँ, अब पनि उसको हर सपना पूरा गर्न म सधैं साथमा छु।” शिलाको यो समर्पण र माया कृष्णको सफलताको बलियो आधार बन्यो।
कृष्णले पब्लिक ज्ञानज्योति माविबाट कक्षा १२ को विज्ञान विषयमा ३.९६ जिपिएसहित नेपाल प्रथम स्थान हासिल गरे। यो उपलब्धि उनको मेहनत, गुरुहरूको मार्गदर्शन र परिवारको साथको संयुक्त परिणाम थियो। “अभिभावकको साथ, गुरुहरूको लगाव र मेहनतले यो सम्भव भयो,” कृष्णले संक्षिप्त प्रतिक्रिया दिँदै भने। उनले समय व्यवस्थापनको महत्त्वलाई जोड दिँदै भने, “सही तरिकाले समयको उपयोग गरेर पढ्ने हो भने कुनै पनि लक्ष्य असम्भव छैन।” पब्लिक ज्ञानज्योतिका प्राचार्य सुरेन्द्र जिसीले कृष्णको मेहनत र लगनशीलताको प्रशंसा गरे। “कृष्ण निकै अनुशासित र मिहिनेती विद्यार्थी हुन्। उनको यो उपलब्धिले हाम्रो विद्यालयलाई गर्वको अनुभूति भएको छ,” उनले भने। पालिकाको सिफारिसमा कृष्णलाई कलेजले निःशुल्क पढ्ने अवसर प्रदान गरेको थियो, जसले उनको आर्थिक बोझलाई कम गरायो।
कृष्णको यो सफलता केवल उनको व्यक्तिगत उपलब्धि मात्र होइन, यो ती सबैका लागि प्रेरणा हो, जो जीवनमा कठिनाइहरूको सामना गरिरहेका छन्। उनको कथाले यो सन्देश दिन्छ कि सङ्घर्षका बीच पनि यदि दृढ सङ्कल्प र निरन्तर मेहनत छ भने, कुनै पनि लक्ष्य हासिल गर्न सकिन्छ। ढुङ्गाको काप फोडेर उम्रने पीपलजस्तै, कृष्णले आफ्नो जीवनमा आएका अवरोधहरूलाई चिरेर सफलताको शिखर चुमेका छन्।
भविष्यका सपना कृष्णको यो उपलब्धि केवल एक सुरुवात हो। उनको आँखामा अझ ठूला सपनाहरू छन्। बुवाको अधुरो सपनालाई पूरा गर्न र देशको लागि केही गर्ने उनको अठोट अटल छ। दिदी शिलाले पनि भाइको हर कदममा साथ दिने वाचा गरेकी छन्। कृष्णको सङ्घर्ष हरेक युवालाई प्रेरणा दिन्छ कि जीवनमा जतिसुकै कठिनाइ आए पनि, मेहनत र विश्वासले ती सबैलाई जित्न सकिन्छ।
