घोराही, ३१ वैशाख । पानीको स्रोत बढाउन र आयआर्जनमा टेवा पुर्याउन घोराही उपमहानगरपालिकाले विभिन्न स्थानमा दर्जन बढी कृत्रिम जलाशयको निर्माण गरेको छ ।
उपमहानगरले घोराही क्षेत्रमा क्रमशः पानीको मुहान सुक्न थालेपछि पानी जोगाउन कृत्रिम जलाशय निर्माणमा जोड दिएको हो । घोराहीमा सहरी क्षेत्र विस्तार हुँदै गएपछि पानीको अभाव पनि बढ्न थालेको हुँदा नगरपालिकाले घोराहीका अधिकांश स्थानमा कृत्रिम जलाशयको अवधारणा अगाडि सारेको हो ।
जसमा नयाँ कृत्रिम जलाशय निर्माणदेखि पहिलेदेखि रहेको पानी पोखरी, दहहरुलाई थप मर्मत गरी उपयोगी जलाशय बनाउन थालेको हो । वर्षाको समयमा आकाशबाट आउने पानीलाई संकलन गरी स्थानीय जनताहरुको जीविकोपार्जन र आयआर्जनमा जोड दिने उद्देश्यले जलाशयको निर्माणलाई प्राथमिता दिएको घोराही उपमहानगरका इन्जिनियर रामधन श्रेष्ठले जानकारी दिए ।
![](https://www.sancharonline.com/wp-content/uploads/2018/05/pic-tal.png)
उनकाअनुसार कार्यालयले अहिले घोराहीको वडा नम्वर १७ को ढिकपुर र गुलरिया, वडा नम्बर १६को गंगटे र ज्यामिरे भन्ने स्थानमा कृत्रिम जलाशय निर्माणको पक्रिया अगाडि बढाएको छ । यस्तै वडा नम्बर १८ को गिठेपानी, वडा नम्बर १२ को सिस्नेरीलगायतका स्थानमा नयाँ कृत्रिम जलाशय बनाउन लागेको उनले जानकारी दिए ।
इन्जिनियर श्रेष्ठका अनुसार उपमहानगरले वडा नम्बर १६को ज्यामिरेमा पहिलेदेखि नै रहेको थप दुईवटा जलाशय मर्मत गरिरहेको छ भने घोराही १७ गुलरियामा रहेको जलाशय, १६ को गंगटे, वडा नम्बर १८ को सल्लाघारी, डबरीलगायतका स्थानमा रहेको कृत्रिम जलाशयलाई थप निर्माण तथा ममर्त गरी सिंचाईको लागि पानी प्रशस्त बनाएको छ ।
यी स्थानहरुमा बनाइएको जलाशयमा स्थानीयबासीले सिंचाई, माछापालन, तरकारी खेती, फलफूल खेती गरिहेको इन्जिनियर श्रेष्ठले बताए । ‘सिंचाई, व्यावसायिक टुरिजम, माछापालन, हाँसपालनका लागि हामीले कृत्रिम जलाशय निर्माण गरेका हौँ’ उनले भने ‘मुख्य कुरा जलवायु अनुकुलन कै लागि हो ।’
![](https://www.sancharonline.com/wp-content/uploads/2018/05/DSC02239.jpg)
गाउँमा रहेको कुवा, इनार, जरुवा, ट्युवेलको पानी नसुकोस् भनेर पनि कृत्रिम जलाशयमा उपमहानगरले लगानी गरेको उनले बताए । यस्तै पशुचौपाया, वन्यजन्तु, चराचुरुङ्गीको बासस्थान सुरक्षित गर्न र कलकारखानालाई आवश्यक पानीको आपूर्तिमा पनि यसले सहजता थपिरहेको उनको भनाइ छ ।
अहिले ठाउँ ठाउँमा बनाइएको र बन्न थालेका कृत्रिम जलाशय एउटा सानो पर्यटकीय क्षेत्र जस्तो बन्न थालेको उनले बताए । ‘नगरपालिकाको आन्तरिक आयमा बृद्धि गर्न पनि जलाशयले टेवा पुर्याइरहेको छ’ उनले भने ‘जलाशयमा ढुङ्गा चलाउने, जाल हानेर माछा मार्ने कार्य अहिले पनि भैरहेको छ ।’
![](https://www.sancharonline.com/wp-content/uploads/2018/05/DSC_0659.jpg)
घोराही उपमहानगरले यस आर्थिक वर्षमा मात्रै करिव दुई करोड रुपैयाँ कृत्रिम जलाशयको लागि खर्च गर्दैछ । जसमा नयाँ बन्न थालेको र मर्मत सम्भार गरिने जलाशयहरु छन् ।
उपमहानगरले कृत्रिम जलाशय बनाउने काम करिव ६० प्रतिशत सकिएको र बाँकी पनि चाँडै सक्ने भन्दै तीव्र रुपमा काम गरिरहेको जनाएको छ । घोराहीमा रहेका जलाशयहरु चार/पाँच कठ्ठादेखि ५ विगाहा क्षेत्रफलसम्म फैलिएका छन् । अहिले जलाशयमा माछापालन, तरकारी खेती, मकै खेतीसँगै पर्यटकहरु घुम्न जाने केन्द्र बनेको छ ।
Advertisements
![](https://www.sancharonline.com/wp-content/uploads/2021/06/1-1.jpg)
![](https://www.sancharonline.com/wp-content/uploads/2024/07/Tribeni-Salyan.jpg)
![](https://www.sancharonline.com/wp-content/uploads/2022/03/Darma-Police.jpg)