दाङ, ८ साउन । नेपालगञ्जबाट सल्यानको रागेचौर जाँदै गरेको यात्रुवाहक फोर्स गाडी कुमाख गाउँपालिका–२, बढाई ज्युला नजिक बिहीबार दिउँसो दुर्घटनामा पर्दा चालकसहित १५ जना घाइते भएका छन्। तीमध्ये १४ जनालाई गम्भीर घाइते अवस्थाका कारण थप उपचारका लागि नेपालगञ्ज पठाइएको जिल्ला प्रहरी कार्यालय सल्यानले जनाएको छ।
गम्भीर घाइतेमध्ये सल्यान कुमाख गाउँपालिका–६ का २८ वर्षीय चालक पारश आचार्य, ३६ वर्षीय भुपेन्द्र बस्नेत, ६३ वर्षीय टिकाराम आचार्य, ३२ वर्षीया दिपा बुढाथोकी र उनकी ६ वर्षीया छोरी कोपिला बुढाथोकी, १६ वर्षीय इन्द्र रावत, ५६ वर्षीय डोले बस्नेत, ३५ वर्षीया निर्मला बुढाथोकी, १० वर्षीया जेनिशा राना, ७ वर्षीय महेन्द्र बस्नेत, ६२ वर्षीय कालीमान हमाल, सुर्खेत भेरीगंगा नगरपालिका–९ की ३१ वर्षीया तुलसा सुनार, रुकुम पश्चिम चौरजाहारी नगरपालिका–१ की ८४ वर्षीया चन्दी बिष्ट र ३१ वर्षीया कुन्ता बिष्ट रहेका छन्। प्रहरी प्रमुख डिएसपी हेम बहादुर केसीका अनुसार उनीहरूको अवस्था गम्भीर छ र तत्काल उपचारका लागि रेफर गरिएको हो।
यस्तै, सामान्य घाइते भएका रुकुम पश्चिम चौरजाहारी नगरपालिका–४ का २३ वर्षीय भुवन लामिछानेलाई चौरजाहारीको मिशन अस्पतालमा पठाइएको छ।
प्रहरीका अनुसार भे १ ख ३९९४ नम्बरको गाडी दिउँसो करिब १ बजे अनियन्त्रित भई सडकबाट करिब २५ मिटर तल खसेको हो। दुर्घटनापछि प्रहरी र स्थानीयवासीले घाइतेको उद्धार गरी तत्काल अस्पताल पठाएका थिए।
यो घटनाले ग्रामीण सडक सञ्जालको कमजोर अवस्था, सवारी नियन्त्रण र सुरक्षा व्यवस्थापनप्रति पुनः प्रश्न उठाएको छ। यात्रुवाहक गाडीको नियमित मर्मत, दक्ष चालक र सुरक्षित सडक संरचना नहुँदासम्म यस्ता दुर्घटनाहरू दोहोरिन सक्ने खतरा यस घटनाले देखाएको छ।
