दाङ, ६ मङ्सिर । उदाउँदो सूर्यलाई अर्घ्य दिएसँगै छठ पर्व सकिएको छ । बिहान देशभर विभिन्न पोखरी, नदी, इनारलगायतको पानीको स्रोत भएको ठाउँबाट व्रतालुले सूर्यलाई अर्घ्य दिएका छन् । माटोको घैला, दियो, ढकनी, सर्वी, हात्ती, पानालगायतका सामग्रीसहित बाँसको कोनिया, ढक्की, नाङ्लोमा केरा, ठकुवा, भुसवा, खजुरीलगायतका परिकार राखेर जलाशयमा शरीर डुबाउँदै उदाउँदो सूर्यलाई अर्घ्य दिने गरिन्छ ।
दाङको घोराहीमा पनि हिजो अस्ताउँदो सूर्यलाई अर्घ्य दिएपछि राति कटुवाखोला किनारमा अर्घ्य दिइएका सामग्रीहरू त्यहीँ राखेर रातभर नाचगान र रमाइलो गरेका थिए । आज कात्तिक शुक्ल सप्तमी तिथिका दिन उदाउँदो सूर्यलाई अर्घ्य दिएपछि छठ पूजा समापन भएको मानिन्छ ।
कात्तिक शुक्ल षष्ठीको बेलुका अस्ताउँदो र सप्तमीको बिहान उदाउँदो सूर्यलाई अर्घ्यसहित गरिने छठ पूजाले निरोगी हुने, छालाजन्य रोगव्याधि नलाग्ने धार्मिक मान्यता रहेको छ । चार दिनसम्म मनाइने लोकपर्व छठ यसपालि कोरोना भाइरसका कारण पोहोर परारको भन्दा फरक देखियो ।
छठ पर्वमा सूर्यकी छोरी छठी माताको पूजा गर्ने गरिन्छ । छठ पर्व खास गरेर शक्तिको पूजा भएको घोराहीका विनयकुमार मिश्र बताउनुहुन्छ । सूर्यभन्दा शक्तिशाली केही पनि नभएको भन्दै उहाँ भन्नुहुन्छ “पृथ्वीलाई चलाएमान बनाउने सूर्य नै हो । सूर्यकै शक्तिले जति पनि जीवजन्तु, वनस्पति बाँच्न सकेकाले नै छठ पर्वमा सूर्यको आराधना गरिन्छ ।” नुहाएर शुद्ध भएर भक्तजनहरु ब्रत बस्ने गर्दछन् । छठमा ३६ घण्टासम्म निर्जल ब्रत बस्ने गरिन्छ ।
छठ पर्वको लामो इतिहास भए पनि दाङमा यसको धेरै लामो इतिहास नभएको मिश्र बताउनुहुन्छ । पछिल्लो समयमा बर्सेनी छठ पर्व मनाउनेको सङ्ख्या बढ्दै गएको उहाँको भनाइ छ ।
